SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

11-noyabr “Kásiplik awqamları kúni” múnásibeti menen taraw belsendileri sıylıqlandı

Bárshemizge belgili, mámleketimiz basshısınıń baslaması menen elimizde 11-noyabrdi “Kásiplik awqamları kúni” etip belgilew usınısı bildirilgennen keyin «Ózbekstan kásiplik awqamları kúnin belgilew haqqında»ǵı nızam qabıl etildi hám usı sáne «Kásiplik awqamları kúni» sıpatında belgilenip kelmekte.
Usı bayram múnásibeti menen Ózbekstan kásiplik awqamları Federaciyası Qaraqalpaqstan Keńesi tárepinen Qaraqalpaq mámleketlik jas tamashagóyler teatrında «Kásiplik awqamları kúni»ne baǵıshlap saltanatlı iláj ótkerildi. Ilájda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, bayram múnásibeti menen bársheni qızǵın qutlıqladı. Ilaj dawamında Qaraqalpaqstan Respublikası Joqarǵı Keńesi tárepinen bir qatar belsendiler mámleketlik sıylıǵı menen sıylıqlandı.

Xoshametlew hám sıylıqlaw máresiminen keyin iláj qatnasıwshılarına koncert baǵdarlaması qoyıp berildi. Sonıń menen birge iláj sheńberinde Ózbekstan kásiplik awqamları Federaciyası Qaraqalpaqstan Keńesi tárepinen tarawda múnásip xızmet kórsetip, ózleriniń úlesin qosıp kiyatırǵan kásiplik awqam belsendilerine Húrmet jarlıǵı hámde sawǵalar tapsırıldı. Quwanıshlısı, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń kásiplik awqamı komiteti baslıǵı G.Kazaxbaeva da usı belsendiler qatarında Húrmet jarlıǵı menen sıylıqlandı. Usı orında G.Kazaxbaevanı búgingi kásiplik bayramı menen qutlıqlaymız! Sizge jumıslarıńızda tabıslar, kúsh-ǵayrat tileymiz! Hámiyshe energiyaǵa tolıp, óz iskerligińizdi alıp barıwıńızǵa hám jetiskenliklerge erisiwińizge tilekleslik bildirip qalamız.