SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qábiletli jaslar «Talant shou» tańlawında anıqlandı

Filial student-jasları arasında qábiletli jaslardı tańlap alıw ushın «Talant shou» tańlawı ótkerildi. Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov ilájdı kiris sózi menen ashıp berip, student-jaslar arasınan ayrıqsha qábilet iyelerin anıqlaw ushın ótkerilip atırǵan tańlawdıń áhmiyetine toqtaldı.
Tańlaw dawamında qatnasıwshılar kórkem óner, mádeniyat, ayaq oyın, ádebiyat, hám basqa da tarawlarda óz ónerlerin kórsetip belsene qatnastı. Atap aytqanda janlı hawazda qosıqlar atqarıldı, monologlar aytılıp, saz-ásbaplar járdeminde namalar jańladı, ájayip shoq ayaq oyınlar atqarıldı.

Tóreshiler quramı tárepinen hár bir qatnasıwshınıń shıǵıwı ádil tárizde bahalanıp bardı. Pozitiv keypiyatta ótkerilgen tańlaw juwmaǵında sıylı birinshi orınǵa mádeniyat tarawı boyınsha qaraqalpaq milliy ayaq oyının kámine jetkerip atqarǵanı ushın 2-kurs 204-topar studenti Umida Bekbosinova ılayıq dep tabıldı. Ádebiyat tarawı boyınsha 2-kurs 203-topar studenti Miratdin Eshmuratov 2-orındı, ózbek milliy ayaq oyının atqarǵanı ushın 3-kurs 315-topar studenti Nasiba Orınbaeva 3-orındı iyeledi. «Talant shou» tańlawı jeńimpazları jaqında filialda ótkeriliwi rejelestirilip atırǵan sport tarawı boyınsha ótkerilgen jarıslardıń sıylıqlaw máresimi sheńberinde sıylıqlanıwı atap ótildi.