SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Haq jol Sizge, pitkeriwshi!»: Bolajaq veterinar qánigelerge diplom tapsırıldı

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń 2022-2023-oqıw jılıpitkeriwshilerine «Haq jol Sizge, pitkeriwshi!» atamasındaǵı diplom tapsırıw máresimi bolıp ótti.

Onda filial basshıları, Qaraqalpaqstan Respublikası Veterinariya hám sharwashılıqtı rawajlandırıw komiteti baslıǵı M.Qaypanov, pitkeriwshi jaslar hám olardıń ata-anaları hámde professor-oqıtıwshılar qatnastı. Filial direktorı Adilbay Esimbetov óz shıǵıp sóylewinde, jańa ómirge isenimli qádem taslap atırǵan pitkeriwshi jaslardı qızǵın qutlıqlap, olardıń hár biri jámiyette óziniń múnásip ornın tabıwı hám ustazları tárepinen berilgen bilimlerdi ámeliyatqa engizip, taraw rawajlanıwında iygilikli úlesin qosıwına úlken isenim bildirdi.

Máresim dawamında 75 pitkeriwshi jaslarǵa diplomlar saltanatlı túrde tapsırıldı. Usınday tolqınlandırıwshı máwritlerde perzentleriniń quwanısh hám shadlıǵın birge bólisiw ushın kelgen ata-analar sózge shıǵıp, 4 jıl dawamında jalıqpay bilim bergen ustazlarına óz minnetdarshılıǵın hám iygilikli tileklerin bildirip ótti.

Veterinariya medicinası, zooinjeneriya (jılqıshılıq hám túyeshilik ), zooinjeneriya (balıqshılıq) qánigelikleri boyınsha bilim alǵan jámi 75 studentke diplom tapsırıldı. Maǵlıwmat ushın, ótken jılı filial tariyxındaǵı dáslepki qarlıǵashlar bolǵan 36 student oqıwdı tamamlaǵan edi. Qánigeligi boyınsha diplomǵa iye bolǵan barlıq pitkeriwshi jaslardı qutlıqlaymız hám talmas tabıslar tileymiz!