Fakultet dekanı oqıw jılı juwmaǵı boyınsha ata-analar menen ushırasıw ótkerdi

Búgin filialda oqıw jılı juwmaǵı boyınsha studentlerdiń ata-anaları menen ushırasıw bolıp ótti. Veterinariya hám zooinjeneriya fakulteti dekanı A.Kaniyazov ushırasıwdı kiris sózi menen ashıp berdi hám alıp bardı. Ata-analar menen alıp barılǵan ashıq sáwbetlesiw dawamında oqıw jılı juwmaǵınıń nátiyjelerine bola, studentlerdiń sabaqlardı ózlestiriw intası, oqıwǵa qatnası, úlgili minez-qulqı hám jámiyetlik jumıslarda óziniń belsendiligi menen ajıralıp turǵan bir topar studentler haqqında aytıp ótildi.  

Sonday-aq, jıl dawamında kóp sabaq qaldırǵan hám keshigip keliwshi studentlerdiń ata-anasına eskertiw berip ótildi.  Fakultet dekanı tárepinen bıyılǵı oqıw jılında erisilgen unamlı nátiyjelerde studentlerdiń qosqan úlesi salmaqlı bolǵanlıǵı ayrıqsha atap ótildi. Sonıńmenen bir qatarda oqıw processinde ushırasqan kemshilikler hám olardı saplastırıw baǵdarında alıp barılǵan jumıslar haqqında toqtap ótildi. Ushırasıwǵa kelgen ata-analarǵa filialdaǵı oqıw barısı hám  imtixan processleri tuwralı tolıq maǵlıwmatlar berip ótildi. 

Bolıp ótken ashıq sáwbetlesiw dawamında ata-analarda sózge shıǵıp, perzentiniń sapalı bilim alıwı ushın jaratılǵan múmkinshilikler ushın óz minnetdarshılıǵın bildirip, pikir hám usınısların aytıp ótti. Studentlerdiń ata-anaları menenbaylanıstı jaqsı jolǵa qoyıw arqalı, olardıń oqıwǵa bolǵan múnásibetin, pánlerdi ózlestiriwge degen qızıǵıwshılıǵın arttırıw hám tártip-intizamǵa boysınıwın támiyinlew jaǵınan hár tárepleme paydalı bolıp sanaladı. Alıp barılǵan sáwbetlesiw dawamında barlıq tiyisli máseleler dodalandı.

Málimleme xızmeti