SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Jawızlıqqa qarsı – aǵartıwshılıq» atamasında úgit-násiyat ilajı bolıp ótti

Usı jıldıń 24-may kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «Jawızlıqqa qarsı – aǵartıwshılıq» atamasında úgit-násiyat ilajı bolıp ótti. Jaslardıń buzǵınshı jat ideyalar tásirine túsip qalmawına qaratılǵan bul ilajda Ózbekstan Respublikası Din isleri boyınsha komiteti Qaraqalpaqstan aymaqlıq basqarması Nókis qalalıq qánigesi Q.Nezamatov, Muhammed ibn Ahmad al-Beruniy atındaǵı orta arnawlı islam bilim jurtı oqıtıwshısı I.Allayarov hám usı oqıw jurtınıń studenti P.Sagadedinov, Ózbekstan Respublikası Din isleri boyınsha komiteti Qaraqalpaqstan aymaqlıq basqarması bólim jetekshisi H.Ibrayimova, professor-oqıtıwshılar hám studentler qatnastı.

Ilajdı Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov kiris sózi menen ashıp, búgingi globallasıw processinde pikirge qarsı pikir, ideyaǵa qarsı ideya, jawızlıqqa qarsı aǵartıwshılıq oǵada úlken áhmiyetke iye ekenligi, usı princip tiykarında jaslardı milliy qádiriyatlarımızǵa sadıq hám dúnyaqarası keń qılıp tárbiyalawdıń áhmiyetine toqtaldı. Ilajda sózge shıqqanlar, ósip kiyatırǵan jas áwlad óziniń erkin pikirine iye bolıwı, zamanagóy bilimlerdi ózlestirip, joqarı mánawiyatlı, jetik sawatlı, sabır-taqatlı bolıp, hár qánday ideyalıq hám informaciyalıq qáwiplerge hár dayım tayın turatuǵın insan bolıp jetilisiwi kerek ekenligin atap ótti.

Qánigeler tárepinen ilaj qatnasıwshılarına tolıq maǵlıwmatlar berip ótildi. Student-jaslarǵa ustazları tárepinen berilip atırǵan bilimlerdi puqta ózlestirip, iygilikli maqsetlerdi ámelge asırıw hám buzǵınshı jat ideyalarǵa qarsı ózlerinde immunitetti payda etiw másláhat etip ótildi. Keshe miymanları tárepinen temaǵa baylanıslı turmıslıq mısallar keltirip ótildi hám qızıqlı sociyallıq videorolik qoyıp berildi. Ilaj soraw-juwap formasında dawam etip, jıynalǵanlar ózlerin qızıqtırǵan sorawlarǵa juwap aldı. Studentler keń hám anıq túsiniklerge iye boldı.