SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Jaslar hám innovaciyalıq awıl xojalıǵı» kórik-tańlawı ótkerildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında óz qánigeligi boyınsha bilimlerdi puqta ózlestirip, taraw boyınsha jańalıq jaratıwǵa, innovaciyalıq ideyalardı ilgeri súrip, zamanagóy pikirlewge umtılatuǵın jaslardı qollap-quwatlaw hám olarǵa motivaciya beriw maqsetinde «Jaslar hám innovaciyalıq awıl xojalıǵı» kórik-tańlawı ótkerildi. Ilajdı Hayal-qızlar máseleleri boyınsha direktor másláhatshisi G.Eshmuratova hám Ziyrek studentler ilimiy-izertlew iskerligin shólkemlestiriw bólim baslıǵı A.Jańabaev ashıp berip, qatnasıwshılarǵa tańlawdıń shártlerin esletip ótti.

Tańlawda veterinariya qánigeliginde bilim alıp atırǵan student-jaslardan dúzilgen «Veterinariya» komandası hám zooinjeneriya qánigeliginde oqıp atırǵan studentlerdiń «Zooinjeneriya» komandaları kórsetilgen 4 shárt boyınsha bellesti.

Qatnasıwshılar usı kúnge shekem ózlestirgen bilimlerin sınaqtan ótkeriw menen birge, ayrıqsha intası, oratorlıq sheberligi, adamlarǵa óziniń pikirin tınıq jetkerip bere alıwı jaǵınan belsendiligin kórsete aldı. Ásirese, 3-shártte kórsetilgen awıl xojalıǵın innovaciyalıq rawajlandırıwǵa arnalǵan usınıslar boyınsha prezentaciya qılǵanda, studentler tárepinen paydalı hám nátiyjeli bolǵan ideya hám usınıslar bildiriliwi menen birge, tiykarlanıp berildi.

Qızǵın dodalawlarǵa bay tárizde bolıp ótken tańlaw dawamında komandalar tóreshi aǵzalar quramı tárepinen bahalanıp bardı. Tańlaw juwmaǵında Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov hám «Zooinjeneriya» kafedrası baslıǵı A.Toreshovalar sózge shıǵıp, barlıq komanda aǵzaları óz bilim hám qábiletin kórsetiwge tırısqanlıǵı hám álbette unamlı nátiyjeler kórsete alǵanın atap ótti. Hár eki komanda nominaciyalar boyınsha sıylıqlanıp, olarǵa diplom hám húrmet jarlıqları tapsırıldı. Tóreshiler quramınıń sheshimine bola, tańlawǵa qatnasqan eki komandadan eń belsendi 3 student saylap alınıp, bir komanda dúzilgen halda kórik-tańlawdıń respublikalıq basqıshına shıǵarıw usınısı bildirildi.