SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filial studentleri «Munozara» intellektuallıq oyınında 2-orındı aldı

Usı jıldıń 20-may kúni Ózbekstan jaslar awqamı Qaraqalpaqstan Respublikalıq Keńesiniń baslaması menen Ájiniyaz atındaǵı Nókis mámleketlik pedagogikalıq institutında respublikamızdaǵı joqarı oqıw orınları studentleriniń arasında «Munozara» intellektuallıq oyını ótkerildi.

Oǵan JOOları qatarında Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń student-jasları da belsene qatnastı. Jaslardı erkin hám tıyanaqlı pikirlew, óz poziciyasın bildire alıwǵa úyretiw, ozıq oylı etip tárbiyalaw hám logikalıq pikirlewin arttırıw, básekilesiw, oylaw hám oratorlıq qábiletin qáliplestiriw, sonday-aq olardıń bos waqıtların mazmunlı shólkemlestiriw maqsetinde ótkerilgen oyın dawamında qatnasıwshılar óz sheberligin kórsetiwge tırıstı. Qızǵın dodalawlar, qarama-qarsı hám unamlı pikirler tıńlandı.

Qatnasıwshılar berilgen tema sheńberinde ózleriniń tastıyıqlaw hám biykarlaw pikirlerin ilgeri súrdi. Quwanıshlısı, filialımızdıń studentleri bellesiwde óz sheberligin kórsetip, unamlı nátiyjeni qolǵa kirgizdi. Yaǵnıy, joqarı oqıw orınları arasında 2-orındı aldı. Sonday-aq, Ájiniyaz atındaǵı Nókis mámleketlik pedagogikalıq institutı student-jasları 1-orındı, Nókis kánshilik institutı studentleri 3-orındı iyeledi. Jeńimpazlarǵa shólkemlestiriwshiler tárepinen diplom hám estelik sawǵaları tapsırıldı. Óz ornında, bellesiwde belsendilik kórsetken intalı studentlerimizge aldaǵı waqıtta bunnan da joqarı nátiyjelerge erisiwine tilekles bolıp qalamız. Maǵlıwmat ushın, 1-orındı qolǵa kirgizgen komanda «Munozara» intellektuallıq oyınınıń Respublikalıq basqıshına jollanba aladı.