SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Háwesker atqarıwshılar» kórik-tańlawı ótkerildi

Filialda bilim alıp atırǵan student-jaslar óz qábiletlerin júzege shıǵarıwı ushın jaqınnan kómeklesiw, kórkem óner hám mádeniyatqa bolǵan qızıǵıwshılıǵın jáne de arttırıw hám jas qábiletlerdi jaratıw ushın olardı qollap-quwatlaw maqsetinde Jaslar menen islesiw, ruwxıylıq hám aǵartıwshılıq bólimi tárepinen «Háwesker atqarıwshılar» kórik-tańlawı ótkerildi. Ilajdı Jaslar máseleleri hám ruwxıy-aǵartıwshılıq isleri boyınsha direktordıń birinshi orınbasarı S.Ganiev kiris sózi menen ashıp, bul tańlaw qızıǵıwshılıǵı bar bolǵan jaslarǵa ózlerin sınap kóriwi hám qábiletin kórsetiwi ushın qolay imkan jaratıp beriwin atap ótti.

Barlıq qatnasıwshılarǵa áwmet tilendi. Qatnasıwshılardıń sahnada ózin tutıwı, dawıs imkaniyatları, atqarıw sheberligi, qábileti inabatqa alındı hám qalıs tárizde bahalandı. Tańlaw dawamında studentler gitara hám duwtar shalıw, qosıq aytıw boyınsha óz qábiletlerin kórsetiwge tırıstı. Tańlaw júdá kóterińkilik penen bolıp ótti. Qatnasıwshılar sheber atqarıwshılıǵı menen hámmege xosh keypiyat bólisti. Ásirese, 3-kurs studenti Farrux Rajapbaev ájayip shoq qosıqları menen hámmege quwnaq keypiyat baǵıshladı. Zalda otırǵanlar oǵan qosılıp, qosıqlardı birge atqardı.

Sonıń menen birge 3-kurs studenti Shaxida hám Farrux atqarıwındaǵı duet qosıqları bársheniń kewilinen shıqtı. Barlıq qosıqlardıń janlı tárizde atqarılıwı bolsa, keshege jáne de payız baǵıshladı. Tóreshiler toparınıń juwmaqlawshı bahalaw nátiyjelerine kóre, 3-kurs studenti Shaxida Qarlıbaeva birinshi orınǵa ılayıq dep tabıldı. 3-kurs studenti Farrux Rajapbaev ekinshi orın iyesi boldı. 1-kurs studenti Alisher Zinatdinov úshinshi orındı iyeledi. Tańlaw jeńimpazları diplom hám estelik sawǵaları menen sıylıqlandı. Belsene qatnasqanlarǵa alǵısnama berildi. Kórkem óner hám mádeniyatqa qızıǵıwshılıǵı bálent bolǵan student-jaslardıń qábiletlerin xoshametlep barıw hám qanday qábiletke iye ekenligin kórsete alıwı ushın sharayat jaratıp beriw maqsetinde ótkerilegn «Háwesker atqarıwshılar» tańlawı qızıqlı hám zawıqlı bolıp ótti.