SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Yumorbek filial jámááti hám student-jaslarǵa xosh keypiyat bólisti

Aldın xabar bergenimizdey, filialımızda kórkem óner hám mádeniyat tarawınıń wákilleri menen bir qatar ushırasıwlar ótkerip kelinbekte. Bunnan gózlengen baslı maqset – student-jaslardıń kórkem ónerge degen qızıǵıwshılıǵın jáne arttırıw hám sol arqalı jaslardıń qábiletlerin júzege shıǵarıw hám qollap-quwatlaw bolıp tabıladı. Búgin usınday ushırasıwlardıń náwbettegisi xalqımız arasında Yumorbek atı menen keń tanılǵan qızıqshı hám sóz ustası Maxset Abdijamilov qatnasıwında ótkerildi. Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov ilajdı kiris sózi menen ashıp berdi.

Bunnan soń keshe miymanı sózge shıǵıp, bul tarawǵa 2010-jıldan baslap kirip kelgenligi, Shımbayda ótken balalıq waqıtları, xalıqtıń arasında óziniń házil-dálkekleri menen kirip barıwı ushın qılǵan háreketleri, búgingi kúnde «Qaraqalpaqsha Stand Up»tı rawajlandırıw baǵdarında ámelge asırıp atırǵan jumısları tuwralı aytıp ótti.

Sonday-aq, zalda otırǵanlar menen óziniń kórkem óner hám mádeniyat tarawı haqqındaǵı pikirleri tuwralı ortaqlastı. Ushırasıw soraw-juwap penen dawam ettirilip, studentler M.Abdijamilovqa ózlerin qızıqtırǵan sorawların berip ótti. Keshe dawamında Yumorbek óziniń házilleri menen bárshege xosh keypiyat bólisti.