SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Studentler dıqqatqa ılayıq zıyarat orınlarına sayaxat qıldı

Mámleketimizde ishki hám zıyarat turizmin rawajlandırıw hám hár tárepleme qollap-quwatlaw boyınsha bir qatar nátiyjeli jumıslar alıp barılmaqta. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında bul baǵdarda jaratılǵan keń múmkinshiliklerden utımlı paydalanıwǵa hám student-jaslar ushın elimizdegi dıqqatqa ılayıq orınlarǵa sayaxat shólkemlestiriwge ayrıqsha itibar qaratıp kelinbekte. Usınday saparlardıń biri 9-may eslew hám qádirlew kúni múnásibeti menen 2-kurs 214-topar studentleri hám tyutorı J.Mambetniyazov tárepinen shólkemlestirildi.

Sayaxatshılar Ámiwdárya rayonı aymaǵındaǵı zıyarat ornı bolǵan «Shayx-Jalil» baba maqbarası, Qarataw etegindegi Sultan Ways baba qoyımshılıǵı hám Ámiwdáryanıń oń jaǵalıǵındaǵı Shılpıq tariyxıy esteligine zıyarat qıldı. Student-jaslar sayaxat dawamında bul tariyxıy orınlar menen jaqınnan tanısıp, qızıqlı maǵlıwmatlarǵa iye boldı.

—Student-jaslardı úlkemizdegi dıqqatqa ılayıq zıyarat orınlarına alıp barıw arqalı olardı bay tariyxımız benen jaqınnan tanıstırıw, mádeniy miyraslarımız hám onıń áhmiyeti tuwralı kerekli maǵlıwmatlardı qáliplestirip barıw hám bos waqıtların maqsetli shólkemlestiriwdi jobalastırǵanbız. 214-topar studentleri menen birgelikte ámelge asırǵan sayaxatımız júdá kewilli tárizde bolıp ótti dep oylayman —deydi J.Mambetniyazov Málimleme xızmeti basshısı menen sayaxat tuwralı óz tásirlerin bóliskende. Sultan Ways baba qoyımshılıǵı hám Shılpıq tariyxıy esteligi studentlerde úlken qızıǵıwshılıq payda etip qoymay, onıń tariyxı haqqında bahalı maǵlıwmatlarǵa iye bolıw hám bul orınlardı óz kózi menen kóriw imkanın jaratıp berdi. Iygilikli maqsette shólkemlestirilgen bul sapar sayaxatshılarda umıtılmas tásirlerdi qaldırdı.