SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Elimiz ardaǵındaǵı qosıqshı student-jaslar menen ushırastı

Xalqımız ázelden mádeniyat hám kórkem óner tarawına joqarı dárejede itibar qaratıp kelgen. Mámleketimizde bul tarawdı qollap-quwatlaw hám rawajlandırıwǵa jóneltirilgen ilajlar óziniń unamlı nátiyjesin berip kelmekte. Usılardan kelip shıǵıp, student-jaslardıń milliy kórkem ónerimiz hám mádeniyatımızǵa qızıǵıwshılıǵın arttırıw hám súyispenshiligin qáliplestirip barıwǵa da ayrıqsha áhmiyet berilip, kórkem óner tarawı wákilleri menen ushırasıwlar shólkemlestirilip kelinbekte. Atap aytqanda, búgin Ózbekstan hám Qaraqalpaqstan xalıq artisti, Túrkmenstan Respublikasına xızmet kórsetken artist, «Mehnat shuhratı» ordeni iyesi Mırzagúl Sapaeva filalǵa kelip student-jaslar menen ushırastı.

Ilajdı filial direktorı Adilbay Esimbetov kiris sózi menen ashıp, Prezidentimiz tárepinen qaraqalpaq milliy mádeniyatı hám kórkem ónerine kórsetilip atırǵan ayrıqsha itibarı hám ǵamqorlıǵı nátiyjesinde tarawda búgingi kúnde unamlı jańalanıwlar júz berip atırǵanlıǵı haqqında toqtalıp, Mámleket basshımızdıń Qaraqalpaq xalqınıń biytákirar kórkem ónerine bergen bahalı pikirleri hám táriypin keltirip ótti. Bunnan soń M.Sapaeva sózge shıǵıp, xalqımızdıń ruwxıy turmısında júz berip atırǵan ózgeris hám jańalanıwlar, Prezidentimiz qollap-quwatlawı menen tarawdı rawajlandırıw baǵdarında ámelge asırılıp atırǵan nátiyjeli jumıslar tuwralı aytıp ótti. Keshe qaharmanı student-jaslarǵa kórkem óner tarawına kirip keliw tariyxı, basıp ótken mashaqatlı miynet jolı, jol-joba kórsetken ustazları, xalqımız arasında belgili bolǵan hám júreginen ayrıqsha orın alǵan qosıqlarınıń dóreliw tariyxı, sırt mámleketlerge ámelge asırılǵan xızmet saparı tásirleri haqqında aytıp berdi. Sonday-aq M.Sapaeva kino dóretiwshileri tárepinen súwretke alınǵan filmlerde atqarǵan roli, kadr artındaǵı qızıqlı waqıyalardı lebinde kúlki menen eske túsirdi. Ushırasıw keshesi soraw-juwap penen dawam ettirildi.

Qatnasıwshılar elimiz súygen qosıqshıǵa dóretiwshiligi hám jeke ómiri tuwralı ózlerin qızıqtırǵan sorawlardı berdi. M.Sapaeva zalda otırǵan ıqlasbentlerine shańaraǵı tuwralı da maǵlıwmatlardı aytıp ótti. Mazmunlı sáwbetlesiwden soń, qosıqshı tárepinen bárshemizdiń qálbimizden orın alǵan, zamanlar ótsede gónermeytuǵın qosıqlardıń janlı tárizde atqarılıwı ushırasıw qatnasıwshılarına ájayip keypiyat bólisti. Zaldaǵılar oyınǵa túsip, qosıq qatarların M.Sapaeva menen birge atqardı. Elimiz ardaǵındaǵı qosıqshı, baxıtlı hayal- Mırzagúl Sapaeva menen ótkerilgen ushırasıw student-jaslarda úlken tásirlerdi qaldırdı.