SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Qosıqları hám shıǵarmaları qálbimizge mórlengen insanlar"

Bárimizge belgili hár jılı ataqlı shayır Ibrayım Yusupov tuwılǵan sáne – 5-may kúnin keń túrde belgilew úrdiske aylanǵan. Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında Ózbekstan Qaharmanı, Ózbekstan hám Qaraqalpaqstan xalıq shayırı Ibrayım Yusupov hám Ózbekstan Qaharmanı, Ózbekstan hám Qaraqalpaqstan xalıq jazıwshısı Tólepbergen Qayıpbergenovtıń tuwılǵanına 94 jıl tolıwı múnásibeti menen "Qosıqları hám shıǵarmaları qálbimizge mórlengen insanlar" atamasındaǵı ádebiy keshe bolıp ótti.

Usı ilajda «Ózbekstan Respublikasına xızmet kórsetken jurnalist», Qaraqalpaqstan Respublikasına miyneti sińgen mádeniyat xızmetkeri, shayıra A.Óteniyazova, Qaraqalpaqstan Respublikası xalıq jazıwshısı, filologiya ilimleri kandidatı A.Abdiev, filial professor-oqıtıwshıları, tyutorlar hám student-jaslar qatnastı. Jaslar máseleleri hám ruwxıy-aǵartıwshılıq isleri boyınsha direktordıń birinshi orınbasarı S.Ganiev ilajdı kiris sózi menen ashıp berip, Ibrayım Yusupov hám Tólepbergen Qayıpbergenovtıń ómiri hám dóretiwshiligi haqqında aytıp ótip, bul ullı tulǵalardıń ádebiyatımızǵa qosqan úlken úlesi haqqında toqtaldı.

Ilaj dawamında sózge shıqqanlar keshe qaharmanlarınıń bizge qaldırǵan biybaha miyrası, dóretpeleri keleshek áwladqa da azıq bolatuǵını, ullı sóz zergeriniń bárshege úlgi bolarlıq ómir jolı hám bay mazmunǵa bay dóretiwshiligi tuwralı aytıp ótti. Bul insanlardıń dóretpeleri hesh qashan eskirmeydi, tozbaydı. Mıńlaǵan ádebiyat ıqlasbentleriniń kewilinen tereń orın alǵan bul tulǵalardıń yadı qálbimizge máńgige mórlenip qaladı. Filialda shólkemlestirilgen ádebiy keshe student-jaslar tárepinen tayarlanǵan koncert baǵlarlaması menen dawam etti.

Onda Ibrayım Yusupovtıń tórtlikleri hám Tólepbergen Qayıpbergenovtıń shıǵarmalarınan úzindiler sheberlik penen atqarıldı. Sonday-aq qaraqalpaq xalqına yadıy bolıp qalǵan qosıqlardıń studentler tárepinen namaǵa salıp janlı tárizde atqarılıwı zalda otırǵanlardıń qulaǵınıń qurıshın qandırıp, tamırları arqalı júregine jetip barǵan bolsa ájep emes. Hár birimizdiń qálbimizden orın alǵan bul dóretiwshilerdiń insanıylıq aǵla pazıyletleri de, hesh qashan gónermeytuǵın qosıqları da yadımızda mórlenip qaladı.