SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Álisher Allambergenov: «Hár qanday qıyınshıllıqa dus kelgenimde anamnan motivaciya alǵanman»

Búgin májilisler zalında «Belgili insanlar menen ushırasıw» atamasında «Qaraqalpaqstan Respublikasına xızmet kórsetken artist», elimiz súygen qosıqshı, bárshemizdiń júregimizden orın alǵan «Baralmadım» qosıǵınıń avtorı Álisher Allambergenov penen ushırasıw bolıp ótti. Onda filial professor-oqıtıwshıları, tyutorlar hám student-jaslar qatnastı. Jaslar máseleleri hám ruwxıy-aǵartıwshılıq isleri boyınsha direktordıń birinshi orınbasarı S.Ganiev ilajdı ashıp berip, qosıqshınıń ómiri hám dóretiwshiligi boyınsha toqtalıp ótti.
Bunnan soń keshe miymanı jaslarǵa óziniń kórkem óner tarawına kirip keliwi, xalqımız júreginen orın alǵan qosıqlardıń jaratılıw tariyxı hám belgili insan bolıwǵa shekem basıp ótken mashaqatlı jolı tuwralı aytıp berdi.

—Derlik kópshilik kórkem óner tarawınıń wákillerine júda ańsat, olar tek sahnaǵa shıǵıp eki qosıqtı atqarıp, xalıqtıń húrmetine bólenip, kewili xosh bolıp júredi dep oylaydı. Negizinde, bul tarawdıń da ózine jarasa qıyınshılıǵı hám talap etiletin mashaqatları bar. Bir qosıqtı jaratıw ushın onı kámine keltirip atqarıw ushın sol qosıqtıń ishinde jasaymız —deydi Álisher Allambergenov.

Ushırasıw erkin sáwbetlesiw kórinisinde alıp barıldı. Qosıqshı óziniń balalıǵı, ata-anasınıń qollap-quwatlawı menen usı tarawǵa kirip kelgeni, jaslarımız tilinde aytatuǵın bolsaq «Xit» qosıqlarınıń qalay dúnyaǵa kelgenligi tuwralı aytıp berdi. Sonday-aq, búgingi zamanagóy qaraqalpaq estradası haqqında óziniń bahalı pikirlerin bildirip ótti. Ushırasıw soraw-juwap formasında dawam etti. Zalda otırǵanlar ózlerin qızıqtırǵan sorawlarǵa tolıq túrde juwap aldı. Á.Allambergenov óz sózinde onıń ómirinde anası oǵan hár tárepleme motivaciya bere alǵan insan bolǵanın atap ótti. Sonday-aq, 7 jastan 70 jasqa shekemgi insanlardıń qálbine mórlengen «Baralmadım» qosıǵınıń jaratılıw tariyxı tuwralı qızıqlı waqıyalardı aytıp berdi. Student-jaslardıń mádeniyat hám kórkem óner tarawına bolǵan qızıǵıwshılıǵın jáne de arttırıw hám bul arqalı tarawdıń rawajlanıwın qollap-quwatlawda úles qosıw, belgili insanlar menen ushırasıwlardı shólkemlestiriw arqalı olarǵa motivaciya baǵıshlaw maqsetinde ótkerilgen búgingi ushırasıw shın mánisinde joqarı keypiyatta bolıp ótti. Studentlerdiń sorawlarına bola, bárshemiz súyip tıńlaytuǵın hám qosıqshınıń óz dóretiwshiliginde qol tańbası sıpatında mórlengen «Baralmadım» qosıǵı janlı tárizde atqarılıwı keshege jáne de payız baǵıshladı.