SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Qábiletli qızlar»dıń bántligi támiyinlenip, qosımsha dáramat tabıw imkanına iye bolmaqta

Bárshemizge belgili bolǵanınday, Prezidentimiz baslaması menen joqarı oqıw orınlarında bilim alıp atırǵan student-jaslardıń bántligin támiyinlew, bos turǵan xanalardı studentlerge ajıratıw arqalı dógerek hám basqa xızmetler arqalı olarǵa qosımsha dáramat alıw imkanın jaratıw boyınsha áhmiyetli wazıypalar belgilep berilgen edi. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında usı wazıypalardıń orınlanıwın támiyinlew boyınsha bir qatar ámeliy jumıslar alıp barılmaqta. Atap aytqanda, «Qábiletli qızlar» dógeregi ushın ajıratılǵan xanada filial basshıları tárepinen qayta ońlaw jumısları alıp barılıp, tigiw cexınan tısqarı gózzallıq salonı ushın óz aldına xana ajıratılıp, zárúr bolǵan ásbab-úskeneler menen támiyinlendi.

Tigiw cexındaǵı 10 tigiw mashinası talapqa juwap beretin dárejede ońlap berildi. Búgingi kúnde tigiw cexında jámi 10, gózzallıq salonında bolsa jámi 5 student-qızdıń bántligi támiyinlenbekte. Bul jerde óz iskerligin alıp barıp atırǵan qızlar óz qızıǵıwshılıǵı hám qábiletin júzege shıǵarıwı menen birge qosımsha dáramat tabıw imkanına iye bolmaqta. Jáne bir áhmiyetli tárepi sonnan ibarat, student-qızlardıń bos waqıtları mazmunlı hám paydalı etip shólkemlestirilmekte.

Atap aytqanda, gózzallıq salonında shash túydegi, makiyaj, kirpik egiw hám laminasiya, manikyur xızmetleri jolǵa qoyılǵan bolsa, tigiw cexında sheber qızlarımız tárepinen kiyim-kenshek, prostina, kórpeshe hám kópshik ushın qap tigiw jumısları qızǵın túrde alıp barlımaqta. Sonı ayrıqsha atap ótiwimiz orınlı, 4-kurs studenti L.Yaqıpbaeva tigiw cexında milliy kesteshilik óneri tiykarında libaslar tigiw menen shuǵıllanıp, óziniń bul óner sırların student-qızlarǵa úyretpekte.  Gózzallıq salonına tyutor E.Djumabaeva,  tigiw cexına Hayal-qızlar máseleleri boyınsha direktor másláhatshisi G.Eshmuratova juwapker etip belgilengen.
— «Qábiletli qızlar» dógeregi  shaqqan hám umtılıwshań bolǵan student-qızlardı ózinde jámlegen. Olarǵa óz qızıǵıwshılıǵı hám intasınan kelip shıǵıp, sabaqtan bos waqıtlarında jumıs islewine imkan jaratıldı. Aldaǵı waqıtta «Qábiletli qızlar» tigiwshilik cexı hám gózzallıq salonı iskerligin jáne de keńeytip, kóbirek student-qızlardı qamtıwdı rejelestirip atırmız— deydi E.Djumabaeva.
Eń áhmiyetlisi, studentlerdiń bántligi támiyinlenip, qosımsha dáramatqa iye bolıp atır. Aldaǵı waqıtta bul qábiletli qızlardan istiń unamlı nátiyjelerin kútip qalamız.