“Xalıqaralıq veterinariya kúni” bayramı múnásibeti menen direktor qutlıqlawı
Assalawma áleykum, húrmetli filial jámááti, professor-oqıtıwshılar hámde student-jaslar! Sizlerdi, qalaberse elimizdegi barlıq veterinariya tarawı wákillerin “Xalıqaralıq veterinariya kúni” bayramı menen qızǵın túrde qutlıqlayman!
Bárshemizge belgili, hár jılı aprel ayınıń aqırǵı shembisi Xalıqaralıq veterinariya kúni sıpatında keń túrde belgilenip kelinbekte. Qaysı tarawdı alıp qaramayıq, ózine jarasa mashaqatı, jetiskenligi hám kemshiliklerin kóremiz. Mámleketimizde keyingi jıllarda veterinariya tarawında jedel reformalar ámelge asırılıp, taraw hám onıń tarmaqları izshil rawajlanıp barmaqta. Mámleketimiz basshısı tárepinen bul tarawǵa qaratılıp atırǵan ayrıqsha itibar hámde qatar párman hám qararlardıń qabıl qılınıwı veterinariya tarawınıń jáne de rawajlanıwına bekkem negiz jaratıp berip atır.
Alıp barılıp atırǵan reformalar, hár qanday jańalanıwlar hám ózgerislerden barqulla xabardar bolıp barıwımız tiyis dep oylayman. Sebebi, búgingi kúnde filialımızda usı tarawdıń rawajlanıwına óz úlesin qosa alatuǵın jas kadrlar bilim alıp atır. Sır emes, keyingi jıllarda xalıqtıń sharwashılıq ónimlerine bolǵan talabınıń ósip barıwı veterinariya hám sharwashılıq tarawın rawajlandırıw hámde jetik qánigelerdi tayarlaw zárúrligin payda etip atır. Bolajaq jas veterinarlardı tayarlaw bolsa búginniń áhmiyetli wazıypalarınan biri sıpatında ilgeri súrilip atır.
Sonıń menen birge álbette, taraw boyınsha básekiles kadrlardı tayarlaw ushın imkaniyatlar da jáne de keńeyip barmaqta. Usılardan kelip shıǵıp, filial jámááti menen birgelikte aldımızǵa qoyǵan ullı maqsetlerimizge qaray jańa rejeler hám zamanagóy sistema tiykarında jumıs alıp barǵan halda, jaslarǵa tereń bilim beriwge bar kúsh-ǵayratımızdı sarıplaymız. Bolajaq veterinar qánigelerge hár tárepleme sapalı hám zamanagóy bilimlerdi beriw arqalı veterinariya tarawınıń rawajlanıwına ózimizdiń qalıs úlesimizdi qosıwdı niyet qılǵanbız.
Jelkemizdegi juwapkershilikli wazıypamızdı kámine jetkerip orınlawǵa hám Respublikamızda veterinariya hám sharwashılıq tarawı rawajlanıwına ózleriniń úlken úlesin qosa alatuǵın professional kadrlardı tayarlawǵa háreket qılamız.
Pursattan paydalanıp, barlıq veterinariya tarawı wákilleri, filial professor-oqıtıwshıları hámde bolajaq taraw qánigeleri sanalatuǵın student-jaslardı “Xalıqaralıq veterinariya kúni” bayramı múnásibeti menen shın kewilden qutlıqlayman! Mashaqatlı jumıslarıńızda úlken tabıslar hám talmas ǵayrat tileymen! Tarawdıń rawajlanıwı ushın qalıs xızmet qılıwdan hesh qashan sharshamań! Bársheńizge kúshli energiya hám unamlı keypiyat tileymen!
Húrmet penen,
Esimbetov Adilbay Tlepovich
Biologiya ilimleri doktorı, docent
SamMVMSHBU Nókis filialı direktorı
скачать dle 12.1
Telefon
E-mail
