SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Referendum hám jaslar» forumı studentlerge pozitiv keypiyat baǵıshladı

Respublikamızdaǵı joqarı oqıw orınlarında jaqında bolıp ótiwi kútilip atırǵan ulıwmaxalıqlıq referendumı múnásibeti menen «Referendum hám jaslar» temasında úgit-násiyat ilajları sheńberinde forumlar shólkemlestirilmekte. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında gala-koncert kórinisinde «Referendum hám jaslar» forumı ótkerildi. Ilajda Ózbekstan Respublikası Oliy Majlis Nızamshılıq palatası, Qaraqalpaqstan Respublikası Joqarǵı Keńesi deputatları, ÓzLiDeP, Ózbekstan Xalıq demokratiyalıq partiyası, Ózbekstan Ekologiyalıq partiyası hámde «Milliy tiklanish» partiyası belsendileri filial professor-oqıtıwshıları hám student-jasları qatnastı. Ilaj dawamında deputatlar hám partiya belsendileri tárepinen úgit-násiyat tiykarında shıǵıp sóylewler shólkemlestirildi. Atap aytqanda, jańalanıp atırǵan Ózbekstan Respublikası Konstituciyasınıń mazmunı hám onda bilimlendiriw tarawına tiyisli bir qatar ózgeris hám jańalıqlar óz sáwleleniwin tawıp atırǵanı, ámeldegi 50-, 51-, 52, 53- statyalarına jaslarǵa tiyisli áhmiyetli jańalıqlar kirgizilip atırǵanlıǵı atap ótilip, usı stat'yalarǵa ayrıqsha toqtalıp ótildi. Sonıń menen birge oqıtıwshı hám student-jaslar da sózge shıǵıp, elimizde ámelge asırılıp atırǵan Konstituciyalıq reformalar hám jańa redakciyadaǵı Ózbekstan Respublikası Konstituciyası boyınsha pikirlerin bildirdi.
Forum sheńberinde jańalanıp atırǵan Bas nızamımızda insan qádirin ulıǵlawǵa hám sociyallıq qorǵalıwına ayrıqsha itibar qaratıwǵa hámde jaslarımızdıń sapalı bilim alıwı, hár tárepleme jetik áwlad bolıp tárbiyalanıwın támiyinlewge tiyisli bir qatar stat'yalar kirgizilip atırǵanlıǵı boyınsha tolıq maǵlıwmatlar berip ótildi. Joqarı dárejede shólkemlestirilgen ilaj Qaraqalpaq estradasınıń jarqın juldızlarınıń atqarıwındaǵı shoq qosıqlar menen dawam etti. Jıynalǵanlar zawıq penen oyınǵa túsip, hámmege birdey pozitiv keypiyat baǵıshlandı. Usı sıyaqlı ilajlar arqalı jaqında bolıp ótiwi kútilip atırǵan ulıwmaxalıqlıq referendumınıń áhmiyeti hám jańa redakciyadaǵı Konstituciyanıń mazmunın jaslarǵa keń túsindiriw imkanı jaratıladı.