SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Miynet yarmarkası: Pitkeriwshi kurs studentleriniń bántligi támiyinlenbekte

Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında pitkeriwshi kurs studentleriniń bántligin támiyinlew hám jumıs beriwshiler menen miynet shártnamasın imzalaw maqsetinde bos jumıs orınları miynet yarmarkası bolıp ótti. Qaraqalpaqstan Respublikası Kámbaǵallıqtı qısqartıw hám bántlik ministrligi hám Qaraqalpaqstan Respublikası Veterinariya hám sharўashılıqtı rauajlandırıw komiteti menen birgelikte shólkemlestirilgen usı ilajda Qaraqalpaqstan Respublikası «Sharўanásil» orayınıń direktorı Q.Pirnazarov, Qaraqalpaqstan Respublikası «Qarakól» birlespesi baslıǵı A.Utemuratov, Qaraqalpaqstan Respublikası Kámbaǵallıqtı qısqartıw hám bántlik ministrligi bólim baslıǵı G.Daryabaeva, Qaraqalpaqstan Respublikası Veterinariya hám sharўashılıqtı rauajlandırıw komiteti baslıǵınıń orınbasarı B.Qurbanbaev qatnastı.

Ilajda filial direktorı A.Esimbetov hám basqalar sózge shıǵıp, búgingi kúnde mámleketimizde pitkeriwshilerdiń bántligin támiyinlewge ayrıqsha itibar qaratılıp, bul baǵdardaǵı Mámleketimiz Basshısı tárepinen belgilep berilgen áhmiyetli wazıypalardıń orınlanıwı boyınsha ámelge asırılıp atırǵan jumıslarǵa toqtaldı. Miynet yarmarkasında Nókis qalası hám rayonlardan derlik 40 qa shamalas jumıs beriwshi kárxana hám shólkemler ózleriniń bos jumıs orınları menen qatnastı. Ilaj dawamında pitkeriwshi kurs studentleri hám jumıs beriwshiler jaqınnan sáwbetlesip, ózara pikir almastı. Bolıp ótken miynet yarmarkasında is beriwshiler hám studentler ortasında jámi 23 miynet shártnaması imzalandı hámde studentler bántligi támiyinleniwine erisildi. Usı oqıw jılında bul oqıw dárgayın 3 tálim baǵdarı boyınsha jámi 75 student pitkeredi.

Maǵlıwmat ornında atap ótiw orınlı, ótken jılı dáslepki pitkeriwshilerimiz esaplanǵan jámi 36 studentten 31 student jumıs penen támiyinlenip, házirgi kúnde óz iskerligin alıp barmaqta. Ilaj dawamında studentler ózleri ushın jaratılıp atırǵan usınday keń múmkinshiliklerdi tereń sezingen halda, aldaǵı waqıtta tarawdıń rawajlanıwı jolında xızmet qılıwǵa isenim bildirip qalamız. Miynet yarmarkasında filial studentleri bos jumıs orınları menen jaqınnan tanıstı. Eń áhmiyetlisi, jumıs beriwshiler hám pitkeriwshi kurs studentleri ortasında erisilgen paydalı kelisimler jaqın keleshekte óziniń unamlı nátiyjesin beriwine úmit qılamız.