Nawrız ulıwma-xalıqlıq bayramı múnásibeti menen direktor qutlıqlawı
Assalawma áleykum, húrmetliprofessor-oqıtıwshılar, xızmetkerler hámde student-jaslar!
Sizlerdi jańalanıw hám báhár áyyamı bolǵan Nawrız benen qızǵın túrde qutlıqlayman! Xalqımız bul bayramdı intıqlıq penen kútip, júdá kóterińki keypiyat penen belgileydi. Qalamızdıń hár bir úyine álleqashan bayram keypiyatı kirip bardı. Usı orında filialımızda da Nawrız shadlıqları múnásip tárizde belgilendi. Professor-oqıtıwshılar, barlıq xızmetkerler hámde studentler menen awızbirshilikte súmelek seyilin shólkemlestirip, sahnalastırılǵan saltanatlı bayram keshesin ótkerdik. Aldı menen mine usınday qutlı kúnlerge jetkizgeni ushın mıńnan bir shúkirler bolsın.
Neshe ásirlerden berli ata-babalarımız intizarlıq penen penen kútip alǵan bul qutlı áyyam hámmemiz ushın qanshama qádirli hám kewlimizge jaqın ekenligin sóz benen táriyplew qıyın. Mine, Ana diyarımızda báhárdiń, Nawrızdıń keypiyatı gezip júripti. Adamlardıń
qálbinde iygilikli niyetler, jańa kúnlerden úmit bar. Sebebi, Nawrız biz ushın, áwele, eń qádimgi, milliyligimizdi, qádiriyatlarımızdı ózinde sáwlelendirgen ulıwma- xalıqlıq bayramı bolıp sanaladı. Sol menen birge, óz-ara mehir-múriwbet, qayır-saqawat hám ózligimizdi ańlaw tımsalı. Aldı menen, tábiyat oyanıp, Nawrız keypiyatı kewillerdi shadlıqqa bólep atırǵan usınday baxıtlı máwritlerge aman-esenlikte jetkenimizdiń ózi ullı baxıt ekenligin ańlawımız kerek. Házirgi tınısh-párawan turmısımızda hár bir insan óz qálbindegi iygilikli tileklerdi, niyetlerdi ámelge asırıw, turmısqa, ata-anası, jaqınları menen doslarına mehir hám muxabbattı bildiriwge háreket qıladı. Xalqımızdıń milliy bayramı – Nawrız hámmemizdi insanıylıq, watansúyiwshilik, miynetke tárbiyalaw, tınıshlıqtıń qádirine jetiw, mehir hám múriwbetli bolıw ruwxında tárbiyalawda ayrıqsha áhmiyet quraydı. Sol sebepli, búgingi kúnde Nawrız bayramınıń tárbiyalıq áhmiyeti jáne de artıp, ǵárezsiz elimizdiń student-jasları qálbinde watanǵa muxabbatın qáliplestiriwdey úlken wazıypanı ámelge asırmaqta. Biz hámiyshe elimizde tınıshlıq hám párawanlıq húkim súriwine, xalqımız barqulla bayramlar qushaǵında bolıwǵa, bunnan bılayda úlken nátiyjelerge erisiwimizge bekkem isenim menen qarawımız kerek. Tınıshlıq-bizge berilgen eń ullı inám. Dógerek-átirapımızǵa názer salıp, aspanı ashıq, adamları sada hám haq kewil, tınısh elde baxıtlı turmıs keshirip atırǵanımızdıń gúwásı bolamız. Demek, hár kúni shúkirler keltiriwdi umıtpawımız lazım. Nawrız bayramı áyne usı shúkirshilikti qálbimizge jaylap, ózi menen jaqsılıqlardı alıp keledi. Pursattan paydalanıp, Respublikamız xalqın, áziz ustazlardı, filial xızmetkerlerin hám student-jaslardı jáne bir márte Nawrız ulıwma-xalıqlıq bayramı menen joqarı keypiyatta, qızǵın túrde qutlıqlayman! Ilayım, bayram quwanıshı hár bir úyge kirip barıp, qálbimizde iygilikli niyetlerdi oyatsın. Siz arqalı hár birińizdiń shańaraǵıńızǵa saw-salamatlıq, bereketli dasturxanıńızǵa mol ırısqı-nesiybe tileymen. Turmıstıń shiyrin táshwishlerine kómilip, juwırıp-jortıp júriw bárshemizge nesip etsin! Xalqımızdıń párawanlıǵı jolındaǵı pidáyi miynetińizde kúsh-ǵayrat tileymen! Qálbimdegi barlıq iygilikli tileklerdi sizge jollap qalaman. Nawrız quwanıshı bársheńizge múbárek bolsın!
Húrmet penen,
Adilbay Esimbetov,
SamVMShBU Nókis filialınıńdirektorı
скачать dle 12.1
Telefon
E-mail
