Assalawma áleykum húrmetli hám qádirli apalar!

Gózzal hám mehriban qarındaslar! 

      Báhár ayınıń gózzal bayramı–hayal-qızlarǵa húrmet kórsetiw dástúri jıl sayın ulıwma mámleketlik áhmiyetke iye bolıp, joqarı dárejege kóterilmekte. Jámiyettiń mádeniyat dárejesi, ruwxıy jetiskenligi hayal-qızlarǵa bolǵan múnásibet penen belgilenedi. Dúnyada hayal-qızlar mehriniń bahasın ólsheytuǵın kriteriya, oǵan teńlestiretuǵın baylıq joq. Bul hayal-qız degen ullı insan, ashıq kóńil, biytákirar pidáyılıqtı ózine sińdirgen ullı qálip iyesi. Áne usınday páziyletlerge iye bolǵan hár birińizge 8-mart hayal-qızlar bayramı múbárek bolsın!

Áziz apalar hám qarındaslar!

     Elimizde Prezidentimiz tárepinen alıp barılıp atırǵan ádil siyasattıń arqasında hayal-qızlarımızǵa úlken itibar qaratılıp kelinbekte. 

   Ózbekstan Respublikası Prezidentiniń 2021-jıl 5-martdaǵı «Hayal-qızlardı qollap-quwatlaw, olardıń jámiyet turmısındaǵı belsene qatnasıwın támiyinlew sistemasın jánede jetilistiriw is-ilajları haqqında»ǵı PQ-5020-sanlı qararı hám Ózbekstan Respublikası Ministrler Kabinetiniń 2021-jıl 17-sentyabrdegi «Ata-anası yamasa olardıń birinen ayrılǵan mútáj qızlar hám baǵıwshısı joq jalǵız hayallardıń joqarı bilim alıwın materiallıq jaqtan qollap-quwatlaw is-ilajları haqqında»ǵı 585-sanlı qararı tiykarında Qaraqalpaqstan Respublikası Joqarǵı Keńesi tárepinen filialdıń 2 student qızına bir jıllıq kontrakt pullarınıń tólep  beriliwi de bunıń ayqın mısalı dep bilemiz. 

Elimizde alıp barılıp atırǵan barlıq jaqsı niyet, iygilikli jumısları hám gózzallıqlar Siz analarımız, apa-qarındaslarımız ushın jaratılıp atırǵanlıǵınan baxtıyarmız.

Húrmetli hayal-qızlar!

     Házirgi waqıtta filialımızda 53 hayal-qızlarımız óziniń hadal hám nátiyjeli miynetleri menen óz iskerliklerin alıp barıp atırǵan bolsa, 11 bakalavriyat baǵdarında 435 qız-studentlerimiz tálim tárbiya almaqta.

     Filialda óziniń bilimi, tańlaw hám sport jarıslarına qatnasıp húrmet-izzetke bólenip kiyatırǵan student-qızlardıń qatarı jıl sayın keńeyip baratırǵanlıǵı bárshemizdi quwandıradı. 

      2021-2022 oqıw jılında filialımızda Tólepbergen Qayıpbergenov atındaǵı stipendiantqa birinshi bolıp Zooinjeneriya (balıqshılıq) tálim baǵdarı 3-kurs talabası Dosekeyeva Aqsıngul iye bolǵan bolsa, 2022-2023 oqıw jılında 3 stipendiantıń ekewi qız-student Zooinjeneriya (balıqshılıq) tálim baǵdarı 3-kurs studentleri Koshenova Uǵılxan “Ibrayım Yusupov” mámleketlik stipendiyası iyesi hám Allamuratova Bibizada “Tólepbergen Qayıpbergenov” atındaǵı stipendiyası iyesi bolıwǵa eristi.

Sonday-aq, Veterinariya sanitariya ekspertizası tálim baǵdarı 2-kurs 215-topar studenti Serimbetova Kamilabanu 2022-jıl 16-19-dekabr kúnleri Qazaqstan Respublikası Chimkent qalasında “O’zbek jang san’ati” sport túri boyınsha ótkerilgen Aziya chempionatında  sıylı 3-orın iyeledi hám bronza medalın qolǵa kiritiwi bizlerdi úlken quwanıshqa bóledi.

Qádirli apalar hám qarındaslar, húrmetli hayal-qızlar!

   Jáne bir márte búgingi bayram hámmeńizge múbárek bolsın. Hár birińizge jańa kúsh-ǵayrat, jumıslarıńızda mol tabıs, shańaraǵıńızǵa amanlıq, ózlerińizge bekkem densawlıq tileymen.

Samarqand mámleketlik veterinariya

medisinası, sharwashılıq hám

biotexnologiyaları universiteti 

Nókis filialı direktorı                                        A.T.Esimbetov