SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Tyutorlar basshılıǵında sayaxat shólkemlestirildi

Student-jaslardıń bos waqıtların mazmunlı hám qızıqlı tárizde shólkemlestiriw, olardıń úlkemizdegi tariyxıy orınlar, qádimgi miyraslarımız haqqındaǵı bilimlerin bayıtıp barıw maqsetinde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı «Veterinariya hám zooinjeneriya» fakultetiniń tyutorları A.Baymuratov hám B.Iskakovlar basshılıǵında Xojeli rayonı aymaǵında jaylasqan Mizdaqxan tariyxıy estelik kompleksine sayaxat shólkemlestirildi.

Oǵan profilaktika inspektorı, aǵa leytenant Q.Qaypnazarov, hám «Ekonomika hám gumanitar pánler» kafedrasınıń assistent-oqıtıwshısı A.Abatov hám studentler bardı. Dáslep, student-jaslarǵa XIII ásirlerde qurılǵan Nazlımxan sulıw tariyxıy esteligi haqqında qızıqlı maǵlıwmatlar berildi.

Xalqımız arasında bul tariyxıy estelik tuwralı túrli versiyadaǵı kóplegen ańız hám ráwiyatlar júredi. Sonlıqtan sayaxatshı studentlerge faktlerge tiykarlanǵan maǵlıwmatlar berildi. Sonday-aq, olar sayaxat dawamında bul jerde jaylasqan «Jomart qassap», «Gáwir qala» «Shamun nabiy», «Erejep Qálpe» sıyaqlı tariyxıy miyraslar menen jaqınnan tanısıp shıqtı. Mádeniy hám tariyxıy obektlerdi úyreniw, olardı hám zıyarat hám sayaxat etiwdiń áhmiyeti tuwralı túsinikler berildi.

Mizdaqxan tariyxıy estelik kompleksi kópshilik sayaxatshılardıń dıqqat hám itibarın ózine tarta alatuǵın hám qızıǵıwshılıǵın oyata alatuǵın tariyxıy orınlardan biri bolıp sanaladı. Filial student-jasları sayaxat dawamında kerekli maǵlıwmatlarǵa iye boldı. Jaslar qálbinde mádeniy miyraslarımızǵa degen húrmet hám muxabbatı oyatıwda usı kibi sayaxatlardıń ornı oǵada áhmiyetli bolıp sanaladı. Tyutorlar basshılıǵında Xojeli rayonına shólkemlestirilgen sayaxat ayrıqsha tásirlerge bay tárizde bolıp ótti