SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Pitkeriwshilerdiń ámeliyat processleri úyrenildi

Joqarı oqıw ornı pitkeriwshileriniń pitkeriw aldı ámeliyatı úlken áhmiyetke iye bolıp tabıladı. Sebebi, teoriyalıq hám ámeliy bilimlerdiń teń alıp barılıwı bolajaq kadrlardıń keleshekte tabıslı nátiyjelerdi kórsetiwine tiykar jaratıp beredi. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında bul máselege ayrıqsha itibar qaratılıp, bul baǵdarda áhmiyetli wazıypalar belgilep alınǵan. Sózimizdi ámeliyat temasınan baslaǵanımız biykarǵa emes. Házirgi waqıtta filialımızdıń pitkeriwshi basqısh studentleri kárxana hám fermer xojalıqlarında pitkeriw aldı ámeliyatın ótemekte.

Zooinjeneriya kafedrası baslıǵı A.Toreshova ámeliyat basshılları Z.Dawletova hám B.Kunisovlar menen birge Nókis rayonındaǵı “Nukus agro fish” juwapkershiligi sheklengen jámiyetinde bolıp, ámeliyat processin úyrendi. Bul jerde Zooinjeneriya (balıqshılıq) qánigeliginiń pitkeriwshi basqıshında oqıp atırǵan jámi 25 studentimiz ámeliyat ótep atır. Dáslep ámeliyatshılar ushın jaratılǵan sharayatlar úyrenildi hám bul jerdegi jumıs processi menen jaqınnan tanısıldı. “Nukus agro fish” te biriktirilgen ámeliyat basshıllarınıń ámeliyatshı studentler haqqındaǵı pikirleri tıńlandı.

Taraw qánigeleri studentlerdiń teoriyalıq bilimlerin unamlı bahalap, umtılıwları hám tırısqaqlıǵın atap ótti. Pitkeriwshi kurs studentleri ámeliyat dawamında bul jerdegi jetistirilip atırǵan balıqlardı baǵıw usılları, olardıń keselliklerin anıqlaw, diagnoz qoyıw hám emlew, durıs azıqlandırıwdı jolǵa qoyıw boyınsha ámeliy bilim kónlikpelerine iye bolmaqta. Jumıs processin basqıshpa-basqısh úyrenip, óz tájiriybelerin bekkemlep barmaqta.

— Pitkeriwshi kurs studenteri ushın bul ámeliyat processi eń áhmiyetli dáwir bolıp esaplanadı. 14 hápte dawamında ámeliy bilimlerdi puqta ózlestirip barsa, tayar kadr bolıp qáliplesip baradı. Óz ornında biz professor-oqıtıwshılar da úlken juwapkershilikti sezingen halda, ámeliyat processin baqlap barıwımız zárúr. Áne sonda unamlı nátiyjege erisemiz —deydi A.Toreshova. “Nukus agro fish” ta ámeliyat ótep atırǵan studentlerdiń sharayatları tolıq úyrenilip, ámeliyat basshılları tárepinen tiyisli tapsırmalar berildi.