SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Direktor professor-oqıtıwshılar menen ushırasıw ótkerdi

Bárshemizge belgili, keyingi jıllarda joqarı oqıw orınlarındaǵı professor-oqıtıwshılardıń abıroyın jáne de asırıw, olardı materiyallıq tárepten xoshametlew boyınsha salmaqlı jumıslar ámelge asırılmaqta. Usı orında olardıń ilimiy potencialın arttırıw hám jetik bilimge iye kadrlardı tayarlawda óz úlesin qosıwı ushın zárúr bolǵan sharayatlar jaratıp berilmekte hám kútilip atırǵan nátiyjeler de usıǵan baylanıslı bolıp qalmaqta. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında direktor Adilbay Esimbetov tárepinen professor-oqıtıwshılar qatnasıwında usı temaǵa qaratılǵan ushırasıw ótkerildi.Onda ilimiy isler hám innovaciyalar boyınsha direktor orınbasarı R.Turganbaev, «Veterinariya hám zooinjeneriya» fakulteti dekanı A.Kaniyazov, barlıq kafedra baslıqları qatnastı.

Ushırasıw basında filialdıń búgingi kúndegi ilimiy potencial kórsetkishleri, bul baǵdardaǵı erisilgen nátiyjeler hám ushırasıp atırǵan kemshilikler tuwralı aytılıp, ámelge asırılǵan jumıslar nátiyjeliligi analizlendi. Direktor A.Esimbetov ilimiy potencial kórsetkishi talap dárejesinen tómen ekenin keskin sınǵa alıp, ilimiy dárejege iye professor-oqıtıwshılar sanın asırıw zárúr ekenligi, házirgi kúnde olardıń sanı az bolǵanı ushın unamlı kórsetkish derlik sezilmey atırǵanın atap ótti. Assistent-oqıtıwshılarǵa bul boyınsha eskertiw berip, dekan hám kafedra baslıqlarına tiyisli tapsırmalardı berdi.

— Búgin mámleketimizde ilim-pán rawajlanıwına ayrıqsha itibar qaratılıp atırǵanı biykarǵa emes. Jámiyetimizge joqarı potencialǵa iye hám zamanagóy kadrlardı tayarlap beriw eń áhmiyetli wazıypamız bolıp sanaladı. Sol sebepli, filialda múnásip professor-oqıtıwshılar iskerlik alıp barıwına tiykarǵı másele sıpatında itibar qaratıwımız kerek—deydi A.Esimbetov.

Házirgi kúnde filialda jámi 90 ǵa shamalas pedagog xızmetkerler iskerlik kórsetip atırǵan bolsa, ilimiy dárejege iye professor-oqıtıwshılar 15 ti quraydı. Sonnan, birewi professor, 12 si ilim kandidatı hám filosofiya doktorları hám úshewi ilim doktorı. Ilimiy potencial kórsetkishi 29,4 payızdı quraydı. Professor-oqıtıwshılar menen alıp barılǵan sáwbetlesiw dawamında ilimiy jumıslar nátiyjeliligin arttırıw, zaman menen birge qádem taslap, bolajaq qánigelerge múnásip hám sapalı bilim beriwge tırısıw hám usı sıyaqlı áhmiyetli temalar sheńberinde sáwbetlesiw alıp barıldı. Ushırasıw juwmaǵında kóterilgen máselelerden tiyisli juwmaq shıǵarıw kerek ekenligi atap ótildi.