SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Orınlarda qoyanshılıq boyınsha seminarlar shólkemlestirilmekte

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı Máhállebay islesiw hám isbilermenlikti rawajlandırıw agentligi Qaraqalpaqstan Respublikası basqarması menen birge Qaraqalpaqstan Respublikası Joqarǵı Keńesiniń «Xalıqtıń hám jumıssız jaslardıń bántligin támiyinlew, olardıń dáramatın arttırıw maqsetinde úy sharayatında qoyanshılıqtı rawajlandırıw hám kooperaciya shólkemlestiriw ilajları haqqında»ǵı 1-sanlı jıynalıs bayanlamasınıń orınlanıwın támiyinlew maqsetinde Qaraqalpaqstan Respublikasınıń rayonlarında 14-17-fevral kúnleri aralıǵında seminarlar shólkemlestirilmekte.

Máhállebay islesiw hám isbilermenlikti rawajlandırıw agentligi Qaraqalpaqstan Respublikası basqarması baslıǵı A.Kayraddinov ilaj basında sózge shıǵıp, bul seminardı shólkemlestiriwden gózlengen tiykarǵı maqset hám onnan kútilip atırǵan unamlı nátiyjelerge toqtaldı. Filialdıń “Ekonomika hám gumanitar” pánler kafedrası baslıǵı P.Xojalepesov, «Zooinjeneriya» kafedrası baslıǵı A.Toreshova hámde «Veterinariya medicinası, azıq-awqat qáwipsizligi kafedrası» aǵa oqıtıwshısı A.Seypullaevlar tárepinen agentlik penen birgelikte Shımbay, Taxtakópir, Bozataw, Kegeyli, Qaraózek, Qanlıkól, Shomanay, Moynaq, Qońırat, Ámiwdár'ya, Beruniy, Tórtkúl, Ellikqala rayonlarınıń máhállebay islesiw hám isbilermenlikti rawajlandırıw oraylarınıń xızmetkerleri hámde hákim járdemshileri, háwesker qoyan baǵıw menen shuǵıllanıwshılar qatnasıwında oqıw-seminarları ótkerildi.

Bul seminarlar dawamında úy sharayatında násilli qoyanlardı baǵıw usılları, olardı jetistiriwde nelerge ayrıqsha itibar qaratıw hám olardı qanday azıq penen támiyinlew kerek ekenligi boyınsha tolıq túsinikler berildi. Sonıń menen birge qoyanlarda ushırasatuǵın kesellikler, olarǵa diagnoz qoyıw hám emlew boyınsha bahalı maǵlıwmatlar berip ótildi. Úy sharayatında qoyanshılıqtı rawajlandırıw hám olardı kóbeytiw arqalı dáramat tabıw jolları haqqında keń túsinik hám tiyisli usınıslar berildi.

Sonday-aq, seminar qatnasıwshılarına bul tarawdı rawajlandırıw arqalı jumıssız jaslardıń bántligin támiyinlew hám dáramat deregine iye bolıwǵa kómeklesiw hám baǵdarlawdan ibarat ekenligi aytıldı. Rayonlarda shólkemlestirilgen seminarlar dawamında qoyanshılıq tarawı boyınsha áhmiyetli máseleler dodalandı. Maǵlıwmat ushın, erteń, yaǵnıy 17-fevral kúni Xojeli, Taqıyatas, Nókis rayonı hámde Nókis qalasında seminar jumısı dawam etiwi rejelestirilgen.