SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Analar alım qızlar tárbiyası ushın» atamasında keshe ótkerildi

Usı jıldıń 8-fevral kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «Analar alım qızlar tárbiyası ushın» atamasında keshe ótkerildi.

Onda filialdıń qaharman anaları — Xalmuratova Jumagul Mafurovna hámde Qurbaniyazova Gulsinay Maratovnalar qatnasıp, filialdıń oqıtıwshıları, xızmetker hayalları hám student-jasları menen sáwbet alıp bardı.

Kesheden gózlengen tiykarǵı maqset —jámiyette de, shańaraqta da óz ornın tapqan, abıroyǵa hám húrmetke iye bolǵan qaharman analardı student-qızlarǵa hám jaslarǵa úlgi sıpatında tanıtıp, olarǵa unamlı tárepten motivaciya beriwden ibarat bolıp tabıladı. Kesheniń kiris bóliminde, keyingi jıllarda mámleketimizde Hayal-qızlarǵa qaratılıp atırǵan ayrıqsha itibar hám olarǵa jaratılıp atırǵan keń imkaniyatlar haqqında aytıp ótildi.

Bunnan soń, keshe qaharmanları tárepinen hayal-qızlardıń jámiyetlik-siyasıy turmıstaǵı tutqan ornı hám belsendiligin arttırıw baǵdarındaǵı jumıslar boyınsha atap ótildi. Filialdıń belsendi hayalları ózleriniń turmısı, ómirlik tájiriybeleri menen bólisti. Sonday-aq, búgingi dárejege erisemen degenge shekem basıp ótken mashaqatlı jolı tuwralı qatnasıwshılarǵa aytıp berdi. Ómir sınaqlarına tózimli bolıw, hár qanday tosıqtı shıraylı sabır menen jeńip ótiw, aqıl menen is tutıw boyınsha óz keńeslerin hám násiyatların berip ótti.

— Qaharman analardı basqa mánzillerden izlewimiz shárt emes, olar janımızda, biz benen birge. Biziń wazıypamız olardı student-qızlarǵa úlgi retinde kórsetip beriw hám usınday payızlı keshelerdi shólkemlestirip barıwdan ibarat—deydi Veterinariya hám zooinjeneriya fakulteti dekan másláhatshisi Z.Dawletova. Ilaj dawamında qatnasıwshılar ózlerin qızıqtırǵan sorawlar menen kún qaharmanlarına múrájat etip, tiyisli juwaplardı aldı. Qızıqlı sáwbetlesiw tiykarında alıp barılǵan keshe student-qızlarǵa hár tárepleme paydalı boldı desek asıra aytqan bolmaymız.