SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Psixolog tárepinen tyutorlarǵa seminar ótildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń psixologı M.Allamuratova tárepinen tyutorlarǵa túrli temalarda seminar-treningler shólkemlestirilip kelinbekte. Náwbettegi usınday seminarlardan biri «Studentlerde stresske meyillik bolıwınıń psixologiyalıq ózgeshelikleri» temasında ótkerildi. Onda filial psixologı M.Allamuratova, profilaktika inspektorı, aǵa leytenant Q.Qaypnazarov hámde tyutorlar qatnastı. Dáslep, M.Allamuratova seminar mazmunı boyınsha qısqasha túsinik berip ótti.

Seminar dawamında bolsa qatnasıwshılarǵa stresstiń túrleri hám basqıshları, unamlı hám unamsız tárepleri boyınsha keń túsinik berip ótildi. Insan psixologiyasında túskinlikke beriliw, keypiyattıń ábden túsip ketiwi, qapagershilikke boysınıw halatları ushırasıp turatuǵınlıǵı, eger óz waqtında bul jaǵdaylardı unamlı jeńip óte almasa stresske meyillik kúsheyiwi boyınsha maǵlıwmatlar berildi.

Tyutorlarǵa studentler menen óz-ara individual tárizde jumıs alıp barǵan waqtında, olardıń psixologiyasın tereńirek úyrenip barıw, olardı hár qanday túskinlik sindromına shatılıwdan jıraq bolıwǵa shaqırıw hám bunday jaǵdaylarǵa psixolog penen birgelikte unamlı sheshim tabıw kerek ekenligi másláhat retinde atap ótildi. Temaǵa baylanıslı qızıqlı psixologiyalıq oyınlar ótkerildi. Qatnasıwshılar tolıq túsiniklerdi alıp, zárúr bolǵan maǵlıwmatlarǵa iye boldı. Seminar juwmaǵında bolsa, insan barqulla pozitiv keypiyatta júriwge hám átirapındaǵılarǵa kúlki bólisiwge umtılıwı kerek ekenligi atap ótildi.