“Биз жаман иллетке қарсымыз” атамасында семинар-тренинг өткерилди

Самарқанд ветеринария медицинасы институты Нөкис филиалы “Зооинженерия” кафедрасы тәрепинен филиал студент-жаслары арасында “Биз жаман иллетке қарсымыз” атамасында семинар-тренинг өткерилди. Бул илажға ветеринария ҳәм зооинженерия факультети деканы А.Каниязов, “Зооинженерия” кафедрасы баслығы А.Торешова, Ҳаял-қызлар мәселелери бойынша директор мәслаҳатшиси Г.Ешмуратова, Жаслар менен ислесиў, руўхыйлық ҳәм ағартыўшылық бөлими методисти Қ.Сарсенбаев ҳәмде студент-жаслар қатнасты. Дәслеп, А.Каниязов семинарды кирис сөзи менен ашып берди. Буннан соӊ “Зооинженерия” кафедрасы ассистенти З.Даўлетова студент-жасларға семинар темасы бойынша кеӊ түсиниклерди берип өтти. Инсан өз өмирин мазмунлы етип өткериўи ушын ҳәм физикалық ҳәм руўхый жақтан саламат болыўы зәрүр екенлиги, жаман иллетлердиӊ тәсирине түсип қалмаў ушын жетик инсан болыўға, жақсы тәрбия ҳәм билим алыўға умтылыў керек екенлиги ҳаққында сөз етилди. Спиртли ишимликлерди ишиў, сигарета шегиў, әсир обасы есапланған нәшебентлик сыяқлы ҳәр түрли жаман иллетлерден аўлақ болып, заманагөй, жетик билимли инсан болыўға тырысыў керек екенлиги айрықша атап өтилди. Қатнасыўшыларға теманы жәнеде тереӊирек түсиндириў ҳәмде қызығыўшылығын оятыў мақсетинде ойын ҳәм шынығыўлар өткерилди. Студент-жаслар илаж даўамында өз белсендилигин көрсетиўге ҳәрекет қылды. Улыўмаластырып айтқанда, “Биз жаман иллетке қарсымыз” атамасында өткерилген семинар-тренинг даўамында студентлер кеӊ түсиниклерге ийе болыўы менен бирге унамлы тәсирлерди алды.