SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Qádiriyatlarıń máńgi bolsın, Nawrız!" - Nókiste bayram saltanatı ótkerildi

Búgin, 20-mart kúni Nókis qalasında "Qádiriyatlarıń máńgi bolsın, Nawrız!" súreni astında ulıwmaxalıqlıq seyil bolıp ótti. Bayram ilajları "Doslıq" kanalı boyında kóterińki ruwxta shólkemlestirildi. Seyilde Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı jámááti hám studentler qatnastı.
Seyil dawamında milliy qádiriyatlardı ulıǵlawǵa qaratılǵan túrli mádeniy hám kórkem óner baǵdarlamaları ótkerildi. Studentler janlı atqarıwda milliy qosıqlardı aytıp, ayaq oyınǵa tústi, tamashagóyler bolsa bul atqarıwlardan zawıq aldı. Sonday-aq, jası úlken atalar bayram baǵdarlamaların kórip, qolların pátiyaǵa jayıp, jaqsı tileklerin bildirdi. Bul hámmeniń qálbinde ózine tán estelikler qaldırdı.

Filial direktorı A.Esimbetov bayramnıń áhmiyetin atap ótip, bunday ilajlar bársheni bir jerge jámlep, olarǵa kewildi ashatuǵın shadlıq baǵıshlaytuǵının aytıp ótti. Ol, sonday-aq, bunday ilajlar milliy birlikti bekkemlew, jaslarǵa watansúyiwshilik hám adamgershilikti úyretiwde úlken áhmiyetke iye ekenin atap ótti.
Saltanatlar dawamında dástúriy Nawrız bayramınıń ruwxın keńnen úgit-násiyatlaw, milliy qádiriyatlarımızdı ulıǵlaw hám keleshekke bolǵan isenimdi kúsheytiw maqsetinde kóplegen mádeniy baǵdarlamalar shólkemlestirildi. Bul bayram tek ǵana xalqımızdıń qádiriyatların eske salıp qoymastan, al jaslardı birlestiriwge, olarǵa óz mádeniyatına húrmetti úyretiwge xızmet etti.