SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Studentimiz Jáhán kubogı jarısında gúmis medaldı jeńip alıwǵa miyasar boldı

Usı jıldıń 12-16-aprel kúnleri Qazaqstan Respublikası Shımkent qalasında o'zbek jang san'ati boyınsha Jáhán kubogı jarısı bolıp ótti. 10 nan aslam mámleketlerden sportshılar qatnasıp, jeńis ushın bellesiw alıp barǵan usı jarısta Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń veterinariya-sanitariya ekspertizası qánigeligi 2-kurs 215-topar studenti Serimbetova Kamilabanu Tenelbaevna ekinshi orındı iyelep, gúmis medal iyesine aylandı.

Studentimiz Jáhán kubogı jarısında jeke bellesiwlerde múnásip orındı iyelewi bizler ushın shın mánisinde xoshxabar boldı. Búgin oqıw isleri boyınsha direktor orınbasarı Q.Atanazarov, Veterinariya hám zooinjeneriya fakulteti dekanı A.Kaniyazov hám tyutor J.Mambetniyazovlar chempion qızımızdı Nókis qalası orayındaǵı “Manej” sport kompleksi janında kútip alıp, ózleriniń qutlıqlawların bildirdi.
—Studentimizdiń erisken bunday tabısın úlken quwanısh penen qarsı aldıq. Bunnan aldın Shımkent qalasında ótkerilgen o'zbek jang san'ati sport túri boyınsha ótkerilgen Aziya chempionatında 3-orındı iyelegen edi. Sport tarawında unamlı nátiyjelerge erisetuǵın studentlerimizdiń sanı artıp barıwın tilep qalamız—deydi A.Kaniyazov. Jáhán kubogı jarısında gúmis medal iyesine aylanǵan Kamilabanudı qızǵın túrde qutlıqlaymız hám iygilikli tileklerimizdi bildirip qalamız. Jetiskenlikler dawamlı bolsın. Keyingi jarıslarda da áwmetler tileymiz!